Aalumentu yaali ya fadhukapo niikulya yoshikukuta

Ku Eliaser Ndeyanale

AALUMENTU yaali yomomukunda Okankuzi moshitopolwa shaShikoto oya fadhukapo aniwa niikulya yoshikukuta mEtitano lyoshiwike sha zi ko.

Oshiningwanima shi ka osha li aniwa sha ningilwa pOshigambo omanga aakalimo ya hoka ya li ta ya helula eloli ndyoka lya li lya e ta iikulya posenda pOshigambo.

Omanga aniwa aantu ya li yapwila mokuhelula iikulya, omulumentu gumwe gomimvo dhili pomilongo 40 okwa kudhapo okashako kamwe kuusila noondooha ndatu dhoohi omanga omulumentu gumwe ishewe natango a li afadhukapo noshipakete shomakende gomagadhi.

Shika osha li wo sha kolekwa ku kansela goshitopolwa shaNiipa omusamane Jeremia Ngwena kutya aalumentu yaali oya li ya fadhukapo niikulya yoshikukuta.

Tate Ngwena okwa lombwele onzonkundana ndjika kutya mEtitano lya zi ko kosenda yo kOshigambo okwa li kwa tumwa eloli li fale ko iikulya ashike okwa ka lopotelwa kutya ope na aalumentu ya kutha po iikulya inaya pitikilwa okushininga.

“Aalumentu mbaka ye li pomimvo dho 40 no 34 oya li ya kutha po iikulya yoshikukuta etaya yi nayo. Gumwe okwa li akuthapo oshipakete ashihe shomagadhi namukwawo okwa li akuthapo okashako kamwe kuusila noondooha ndatu dhoohi.

“Ngoka a li akutha po okashako noondooha oku li moluhepo oshoka sho twayi nopolisi kegumbo lye otwa mono kutya omulumentu nguka ota si ondjala. Otwa li wo twa uvu kutya ohazi megumbo oye awike onkene niikulya mbyoka ina tu za ko nayo.

“Ashike mukwawo ohazi ngaa megumbo naantu ashike oshipakete okweshi shi eta pombelewa yakansela ongula yonena (ongula yOmaandaha).

Okwa ti wo aalumentu mbaka yaali oya gandja wo ombili noya popi kutya itaye shi yelekelewe.

Okwa gwedha po wo tati kutya mwene gomukunda Okankuzi ka li athikitha mbala omadhina gaanamikunda ye mboka ya ye li momumbwe yiikulya.

Okwati ooyene yomikunda oya li ya lombwelwa lo pomweedhi Auguste omumvo gwa zi ko opo ya ga ndje omadhina gaanamikunda yawo mboka ta ya si ondjala ashike aniwa mwene gomukunda ngoka okwa li inathikitha omadhina ngoka pethimbo.

Okwati wo kutya ngaashingeyi aantu yomomukunda moka yamwe kayemo momusholondondo gomadhina gaamboka yena okupewa iikulya.

Nuumvo natango aanafaalama yomonooli oye li taya ipula ngele kutya otaya ka teya ngaa nenge oya talela oshikukuta unene tuu sho kuna okapuka hoka ha ka ithanwa okalombo ta ka li po iikunomwa yawo yomomapya.

Okapuka haka okiiteyela momapya gaanafaala  muumbangalantu woshilongo.

okapuka haka ota ku lopotwa ka mo ni ka moshitopolwa shaMusati miikandjohogololo ngaashi Elim, Okahao, Tsandi, Onesi noshowo kOgongo.

Shika osha li wo sha kolekwa ku ngoloneya goshitopolwa shaMusati Tatekulu Erginus Endjala ngoka ayelitha kutya olopota yokapuka taka li iikunomwa yomomapya ashike ina poya kutya okahanagula oohekta ngapi nenge oke li miitopolwa yini mOmusati.

“Otwa tumako aanambelewa yetu yo kombelewa yuunamapya nuuniimuna opo ya ka ninge omapekaapeko yoye tupe olopota kutya okapuka okayonagula miitopolwa yini yoshitopolwa niikunomwa mbyoka ya lika oyithike peni. Otwa tegelela wo ye tu lombwele kutya okapuka ota ka hanagulwa po nomukalo gu li ngiini,” osho Ngoloneya fatulula.

Kansela goshikandjohogololo shaKahao Leonard Shikulo okwati okapuka oka monika mo moshitopolwa she ashike kakishi okendji.

“Nomepya lyandje omo ka li ashike paife oka ninga okashona konima shoo omvula ya loko iikando iyali ya lambathana. Oka li wo ka lopotwa nokombala yoshilongo shaNgandjera,” osho Tate Shikulo alombwele ondjonkundana ndjika oshiwike shika.

Omunafaalama gumwe go pomukunda Ongozi popepi nondoolopa yaKahao okwa lombwele Confidente kutya okapuka okayonagulapo ompagona ye thiluthilu.

Okwati wo okapuka oke li lela kanika oshiponga. Omanga omunafaalama wo gumwe gwedhina Petrina Andreas go pomukunda Iipanda moshitopolwa hogololo shaGongo tati kewete kuna okulya nuumvo oshoka iikunomwa yawo oya lika po.

“Otwa kunununa oshoka iilya mbyoka ya lika po oyindji. Okapuka nako okendji. Okeli pamaludhi gatatu; kamwe okaluudhe, kamwe okazizi (kaziza) nakamwe okena iifufu. Ngashiingeyi ota ka ende ike nopevi,” osho Andreas apopi.

Kansela goshitopolwa shaGongo Tatekulu Wilhem Iiyambo okwati moshitopolwa she, okapuka oka lopotwa pomukunda Opoliyanda. Okwa indile wo aanafaalama opo yathe omikanka opo okapuka ka gwile mo yo taye ka tulilemo ondalu yanelyanga.

Kansela wo gwa Elim Gerhard Shiimi okwa lombwele onzonkundana ndjika kutya okapuka oka mo mi ka momukunda dhomoshitopolwa she ngaashi; Uukwanduudhi, Etope, Omukwa, Onashiku noshowo Olwani.

“Okapuka ota ka endelele. Otaka ha nagula omapya, kalya po iilya thilu paife aantu otaya kunununa dho noombuto ngashiingeyi poombelewa yetu odha pwa po ashike aantu opo tayeya shama esiku ta ye dhi kongo ashike katuna mpoka ta tu dhi adha,” osho Tatekulu Shiimi a fatulula.

Ashike onzonkundana ndjika inayi tseya ngele okapuka ha ka oke li wo kiitopolwa puushinda oshoka oongoloneya yamwe ngaashi Tatekulu Elia Irimari go kOshana na Tatekulu Usko Nghaamwa inaya vula oku yiwa nayo moonkundathana oshoka ngaashi tatekulu Irimari inayamukula. ongodhi ye yopeke sho a li adhengelwa omanga tatekulu Nghaamwa ongodhi ye yopeke oya li ta yi ulike ya dhima.

Governor goshitopolwa shaShikoto tatekulu Henock Kankoshi okwati moshitopolwa she inamu za olopota yokapuka.

Oshiwike sha zi ko oongoloneya yiitopolwa yo konooli oya indile aanafaalama yo miitopolwa ya wo opo ya longe yiitulamo opo ya mone iipalutha.

Ngoloneya goshitopolwa shaHangwena Tatekulu Usko Nghaamwa okwa indile kaanafaalama ya tameke okulima omapya.

Tati wo okwiinekela kutya omumvo nguka oku na omuloka onkene aagundjuka mboka ye li muushimba noshowo moondoolopa ka yena shoka taya ningi na ya galukile komagumbo opo ye ya kwathele aakuluntu ya wo noku lima.

“Aantu naya longe omapya oshoka ondi wete kutya omumvo nguka okuna eloolo. Onkene aantu naya longe yiitulamo.

“Aagundjuka mboka ye li ye li mOndangwa, mOshakati, mOngwediva noshowo mOutapi moka naya shune komagumbo oshoka paife oye li ashike hoka taya nu eembiila nokudhana omashina,” osho Ngoloneya apopi.

Ngavena goshitopolwa shaShikoto tatekulu Henock Kankoshi okwa indile kaanafaalama opo yiikaleke kokule noondingosho.

“Omuloka omwaanawa itashi ti naanaa ehulilo lyoshikukuta, oshoka omvula awike oya pumbwa aantu taya longo omapya yiitulamo,” osho Ngoloneya akumagidha.

Omanga Ngoloneya goshitopolwa shaShana omusamane Elia Irimari okwa ti aanafaalama oya pumbwa oku longa nuudhiginini noshowo oku tonatela iinamwenyo ya wo.

Okwa kunkilile wo aanafaalama ya kotokele omeya ngoka taga kunguluka okuza ku Angola.

Okweya lombwele wo kutya omeya naga fulukithwe uuna ya hala oku ga lokitha unene tuu okunwa.

Okwa indile wo kaantu ayehe unene tuu ooyene yomikunda opo ya lopote aantu mboka taya dhipaga oodhila.

Otati mboka taya dhipaga oodhila naya lopotwe kopolisi noshowo kaanambelewa yopolisi noshowo yegameno lyomidhingoloko.