Alikila iilya ye kookahenge

Ku Eliaser Ndeyanale

OMUNAFAALAMA gwedhina Loide Kadhila ngoka e li omukalimo gomomukunda Iilambo mOngandjela okwa likila iilya ye koondjamba dhoka dha li dhiiteyele mepya lye noku lethekapo iilya ye mbyoka ya li ya muninwa pothaila yi li mepya.

Sho a li ayiwa naye moonkundathana nonzonkundana ndjika pegumbo lye pomukunda gwawo mEtihamano lya zi ko, Kadhila ngoka wo e li yina yuunona utatu okwati oondjamba odha li dha gwayele mepya lye uusiku wEtine lyoshiwike sha zi ko no dha li dha kokotamo omatanga gomaliwa (omakunkulwa) ngoka ga li ga gongelwa mepya lye.

Mboka yedhimona otaya hokolola kutya ookahenge oye li pomwaalu gomilongo ndatunandatu taya ti wo oye li noyana.

Kadhila otatiwo kutya shika hasho oshikando shotango oondjamba tadhiya pomukunda gwawo e ta dhi gwayele mepya lye, ihe odhe shiningile mo momvo 2018. Otati momumvo ngoka oondjamba odha lile epya lye ndele nonande okwa li a tseyithile aanambelewa yuuministeli wegameno lyuushitwe, omakuti nomapashiyoni, kape na shoka sha li sha ningwapo.

Meme Ester okwa ti wo kutya pethimbo ndyoka okwa li atseyithila na kansela goshikandjohololo sha wo shaKahao omusamane Leonard Shikulo ndele kemanya kuza wo ontsi.

Okwa hokololele natango onzonkundana ndjika kutya, egumbo lye ihali mono iikulya yoshikukuta nonande iilya ye ohayi likapo olundji koondjamba.

“Ohaya pe owala mboka aniwa ihaya teme. Kandishi kutya ihaya teme ngiini ngele na tse iilya yetu ohayi lika po ihe ihatu pewa oshikukuta nenge tu futwe oshimaliwa tu kalande iikulya sho iilya yetu ya likapo.

“Ngashingeyi ondi li monkugo yin a onkambe oshoka iilya yetu oya likapo. Kandishi kutya nuunona wandje otandi u pe shike sho iilya ye tu ya likapo,” osho ati ngaaka omanga ta u likile onzonkundana ndjika nkene iilya ya lika.

Kakele kiilya, omuti gomugongo gumwe mepya moka ogwa tewa oshitayi koondjamba.

Oomatende goondjamba otaga monika sho ga lyata noshowo oonyata dhawo dhoka dha thiga mepya moka dhuudha iilya noontanga dhomatanga.

Omasiku ga zi ko opwa kala oolopota dhookahenge taya li omapya moshitopolwa shaMusati.

Uuministeli womidhingoloko, omakuti nomatalelopo owa dhipaga oondjamba mbali pomukunda ngaashi Amarika nOshandumbala konima aniwa sho dha li dha hanagula po iilikolomwa yomomapya yaakwashigwana iiwike iyali ya pita.

Onzokundana yo New Era oya li ya lopota konyala iiwike iyali ya piti kutya omunambelewa omugandjimulombo muuministeli mboka Romeo Muyunda okwa li a lombwele oshikundaneki shoka kutya oondjamba ndhika odha li dha dhipagwa momasiku 27 Apiilili nomasiku 3 Mai moshitopolwa shaMusati.

Muyunda ta fatulula kutya oondjamba mbali odha li dha dhipagwa opo aakwashigwana ya pepelelwe; yimwe oya li ya monithwa oshiponga kaakwashigwana sho ya li tayi zi mepaya omanga onkwawo ya adhika tayi eta uupyakadhi.

Okwa ti mokati koondjamba yimwe oya li ya ehamekwa kaakwashigwana momukunda Orukupa popepi nOkomizema moshitopolwa shaMusati sho ya adhika tayi zi momapya gaantu. Omanga oonkwawo dha li dha tothwa mo kaanambelewa opo aakwshigwana ya pepelelwe.

Muyunda okwa li a fatulula kutya uuministeli otawu tala nawa oonkalo ndhika dhomaipumomumwe pokati kaantu niiyamakuti, nangele otayi tsikile nena naashoka sha li sha ningwa mOshikoto nOmustai otashi vulu okuningwa miitopolwa yilwe uuna iiyamakuti ya tameke okupiyaganeka aantu.