Amwaama a tindilwa ifutile mokakuma

Ku Eliaser Ndeyanale

OMULUMENTU omunamimvo omilongo ndatu okwa li a tindilwa eyifutile mokakuma mOmaandaha goshiwike shika.

Absalom Amwaama ngoka a li a holoka mompangu ya magistrata gwaShakati ota fekelwa ayuga omukulupe gomimvo omilongo hetatu nambali iimaliwa yoondola omayovi omulongo nomathele gatatu.

Otaku hokololwa wo kutya mpanga omukulupe nguka ina yugwa iimaliwa ye, okwa li a dhengwa nokuundulwa mo moshihauto shoonakumuponokela. Ota ku fekelwa nee kutya Amwaama oye gumwe gomaafekelwa yaali mboka ya li ya ponokele omukulupe manga a li alonda moshihauto shawo.

Amwaama okwati okwa hala oku za mo modholongo opo aka kale noyana mboka ta tati kutya oye li mepipi lyoomimvo omishona lela.

Omupopiliko gwe gopaveta Mukaya Nyambe okwati kapena uuyelele wagwana kutya Amwaama oye shili aponokela omukulupe oshoka Amwaama iha hingi o taxi. Naamboka taya ti Nakale mokakuma oyena ashike ongeyo komwenyo oshoka Amwaama ota fekelwa ashike.

MOmaandaha goshiwike sha zi ko oyanakadhona yomukulupe nguka kuku Sofia Naango Kleopas ngoka a li omukalimo go momukunda Ekuku popepi nOkatana oya ti Absalom Amwaama a kale mondjedhililo.

Sho adhengwa noku hilwa moshihauto, kuku Sofia ngoka a li ena omimvo omilongo hetatu nambali (82) okwa li amono oshiponga eta tulewa mosamende nokonima wala yomasiku omashona okwa li aniwa amana oondjenda dhe.

Nakusa kuku Sofia okwa ponokelwa koombotsotso mbali momasiku ga 7 Oktomba nuumvo.

Omufuthi gumwe gomwaamboka yaali ota fekelwa kutya Amwaama na mukwawo gwedhina Mambezi ngoka ta kongwa natango opo a kale a mangwa po kopolisi.

Oyanakadhona ya kuku Sofia oya popi dhika konima yepwaakeno lyeifutilemo modholongo lya Amwaama ngoka a li aholoka komeho gompangu ya Magistrate gwaShakati mOmaandaha goshiwike shika.

Amwaama okwa hala opo apewe epitikilo lyoku ifutila modholongo oshoka aniwa okwa hala akatonatele oyana mboka ye li mepipi lyomimvo dhopevi lela noshowo aniwa kutya oku li kepango lyo HIV.

Epopyo lyaAmwaama kutya okwa hala oku katonatela oyana, olyu uvitha nayi aanona ya kuku Sofia ta ya ti yo kayena yina pethimbo ndika. Oye mu kanitha omo lwa Amwaama ngoka ta fekelwa oye ayuga, nokudhenga noshowo oku umbamo meme gwawo moshihauto she e ta teka okooko noku mona wo oshiponga montulo.

Aanona mbaka meme Sofia ngoka a lukilwa kuku Sofia na meme Victoria Amwele ota ya pula kutya Amwaama sho tati okwa hala aka tonatele oyana, yo otaya tonatelwa kulye?

“Omumati ngoka ota dhana…otati tse ina tu hala meme nenge ota ipula kutya ngu te tu tekula olye? Sho tati okwa hala a ka tekule oyana otati tse katwa li twa hala meme etutekule? Nakale modholongo,” oshomeme Victoria afatulula.

Ota ku hokololwa kutya momasiku ga heyali ga Oktomba, kuku Sofia nomushiinda she omunamimvo omilongo ne nambali (42) Simaneka Ashipala, oya li ye ya kombaanga kOshakati, na kuku Sofia okwa li anana oshimaliwa shoondola omayomvi omulongo nomathele ga tatu meni lyoombaanga.

Sho ya zi meni lyombaanga Amwaama okweya pu yo teya tsakaneke a fa omuhingi go taxi nokweya pula aniwa kutya otaya yi peni e ya fale.

Aniwa sho ya londo moshihauto Amwaama okwa hingi ina uka kopate yondjoka yu u ka kombinga yo kOkatana nokonima okwa londeke omufaalelwa gumwe aniwa tayi kolukanda lwedhina Uupindi.

Amwaama aniwa okweya lombwele kutya omufaalelwa ngoka ota ka tala ohipatululo she pegumbo.  Aniwa kuku Sofia na Simaneka oye wete owala Amwaama ta tokomeke oshihauto alamba ondjila ndjoka yu u ka kOkahao aniwa sho Simaneka emupula kutya oteya fala peni, Amwaama aniwa okwe mu yamukula kutya ote ya fala ashike.

Simaneka aniwa okwa kala tapula mpoka yuukithwa ku Amwaama nasho aniwa ya thiki pokantopa kopomukunda Othingo, omufaalelwa ngoka ya li ya lombwelwa kutya ota ka tala oshipatululo she, okwa zi mo moshihauto etakuthako onomola yoshihauto yokonima nokwa lombwele kuku Sofia na Simaneka ya ze mo moshihauto.

Okwa tameke aniwa takondjele ondjato ya kuku Sofia teya nanamo moshihauto etaye yadhenge nokuya kondjithila pevi.

Omanga aniwa Simaneka ta kondjele ondjato nomulumentu ngoka ya li ya lombwelwa kutya ota ka pitula oshapi ye, Amwaama okwe mutendeke aniwa ombele yOkapi pontulo e ta lombwele Simaneka agandje ondjato nombili oshoka ota dhipagwa yo Oombotsotso.

Aanamikunda yo mEkuku oya yti momunyanyo mOmaandaha opo ya kagandje oombapila yenyenyeto kompangu ya Magistrate mOshakati opo Amwaama ka pewe epitikilo lyoku ifutila mo modholongo.

Oya li yena wo omaposa gashangwa omatumwalaka giili giili gamwe oga shangwa “kalekeni aafuthi kokule natse” omanga gamwe ga shangwa kutya “Nakale oshiholelwa shoombudhi adhihe. Inapewa nande eyifutilemo mondholongo.”

Mombapila ya wo yenyenyeto oya popi mo kutya Amwaama na pewe egeelo lyodholongo yonkalamwenyo oshoka okwa yuga noku ehameka omukulupe ngoka a li ena oku kala oye noku li te mu gamene noku mukwatha ndele ngashingeyi oye ishewe temu longele iilonga iiwinayi.

Eyindilo lye lyeyi futilemo modholongo olya li wo lya tindwa komupolisi ngoka a li emukwata po konima yoshiningwanima shika. Omupolisi okwa lombwele ompangu kutya kewete Amwaama ta ka holoka mompangu ngele okwa pewa eyi futilemo modholongo oshoka ke na oshili.

Omupolisi okwa gwedha po wo kutya pethimbo a li temu shangele momambo, Amwaama okwa li emu lombwele edhina lyiifundja tati oye Absalom Iipinge Teofilus okwa ti wo Amwaama okwa li emulombwele natango esiku lyevalo ka li li mondjila.   

Okwati edhina lya Amwaama nesiku lye lyevalo lyomondjila okwe ke li mona konima sho omuniilonga pamwe naye a li emu u likile okopi yokamutse ka Amwaama.

Magistrate Helena Ekandjo okwa undu lile epwilikino lyeyindilo lyeyifutilemo mondholongo lya Amwaama komasiku omugoyi gomweedhi nguka. Amwaama oku li natango mondjeedhililo.

Okwa kalelwa po kuhahende gwedhina Mukaya Nyambe omanga omweeti gwiihokolola omusamane Shuudeni Pallhus.