Iikombo iheyali ya lika kiinima ka yi shi wike

Ku Eliaser Ndeyanale

AAKALIMO yomomukunda Omukoko popepi no Nakayale mOmbalantu moshitopolwa shaMusati meme Aino Ekandjo nomushiinda she, oya likila oonewewe ya wo ya heyali koshinima kashi shi wike aniwa uusiku wokupendukila Etine lyoshiwike sha zi ko.

Meme Ekandjo okwa hokololele onzonkundana ndjika kutya , iikombo oya li kila popepi nomadhiya go poshana shaShiheke shi li popepi nomagumbo gawo mpoka pOmukoko.

Sho a li ayiwa naye moonkundathana meme Ekandjo okwa ti iikombo oya li yiitsuwa komushiinda ngoka a li e mu tseyithile kutya ope na oonewewe ya sila pomadhiya go ashike oya lika owala komitse omanga yamwe ya lika owala poothingo.

Meme Ekandjo okwa gwedhapo wo kutya konima sho a tseyithilwa kombinga yoshinima shika, ngaashi naanaa hashiningwa opamuthigululwakalo goshiwambo kutya ngele ota ku popiwa pena oshimuna sha sa aanamagumbo yo pomukunda mpoka ohaya katala ngele oshaandja wo na meme Ekandjo okwa li akiinyongamenako yemwene opo a tale ngele oyaandjawo oshoka okwa li ena olune komwenyo omoloonewewe ye yamwe mboka ya li inaya lala mo moshigunda ongulohi ndjoka ya landulwa kesiku ndyoka.

“Sho nda thiki pomadhiya mpoka pwa sila iikombo, onda li nda dhimbulula kutya yimwe yomiikombo mbyoka ya lika oya fa yaandjetu, ashike manga inandi shi koleka kutya oya ndjetu onda shuna kegumbo ndi ka tale kutya ngele iikombo mbyoka ya faathana momalwaala namboka yasa omo ngaa yili. Oshoka yimwe yo miikombo mbyoka ya lika ota yi monika ya fa yaandjetu mbyoka nda li nda tseyithilwa komatango gEtitatu kutya ka yi mo miikwawo.

“Sho nda konaakona miikombo yetu onda dhidhilike wo kutya yimwe yo miikombo mbyoka ya lika oyaandjetu. Oshoka sho nda tala iikombo mbyo ya lika onda dhidhilike pe na okakombo kamwe ka fa oonambwiyu yaandjetu mokutetwa noshowo molwaala lwa ko. Sho nda katala miikombo yaandjetu onda mono kutya oonambwiyu ayehe ka ye mo,” osho meme Ekandjo ahokolola.

Okwa ti wo kutya osha li she ya kumitha unene tuu shoo iikombo mbika ya lika owala komitse no poothingo. Okwa hokolola wo kutya sho ya mono oshinima shika oshikumithi ku yo, oya tseyithile kansela gwa wo goshitopolwa shaOutapi tatekulu Fillemon Shikwambi, ngoka e ya lombwele opo ya tseyithile mwenegomukunda gwa wo oshinima shika.

Sho ya tseyithile mwene gomukunda gwa wo, konima oya dhengele wo aanambelewa yuuministeli wuunamapya nuuniimuna kOutapi ongodhi opo ye ye ya ninge omapekaapeko kutya oonewewe mbaka oya lika koshike.

Meme Ekandjo okwa fatulula wo kutya aanambelewa mbaka oya li ya yi na shimwe sho miikombo mbika opo ye ke shiningile omakonaakono opo ya wape oku mona kutya iikombo oya lika koshike.

Ashike ota ti wo kutya aanambelewa yuuministeli oye ya lombwele aniwa kutya onyama yiikombo mbyoka ina ye yi lya nande.

“Otwa li ngaa tatu ti nenge pamwe oya lika nande okoombwa ndele otwa kumwe ngaa kiikombo ya lika owala komitse no poothingo nashimwe sha nanwa owala omandjandja. Otwa kumwe ngaa. Ngashiingeyi otwa tegelela ngaa eyamukulo oku za kaanamelewa yo kombelewa yuunamapya opo ye tu tseyithile kutya omakonaakono gawo otaga u like kutya iikombo oya lika koshike,” osho meme Ekandjo ati ngaaka.

Okwati wo kutya iikombo mbyoka ya lika oombyoka iinyasha lela –iikombo mbyoka iindema nenge ya vala iikando ooshimwe.