Mayola gondoolopa yaNiipa u likwa omukwatheli gwaShuumbwa
Ku Eliaser Ndeyanale
MAYOLA gondoolopa yaNiipa omusamane Manikies Kambonde okwa u likwa ongomukwatheli gomukwaniilwa Fillemon Shuumbwa Nangolo.
Shika osha li sha igidhwa poshingongi shaakalimo yomoshilongo shOndonga mEtihamano lyoshiwike shazileko shoka sha li shaningilwa poombelewa oonkulu dhoshilongo shoka.
Omukwaniilwa okwa longitha wo ompito ndjoka opo uulike omalenga ge giikandjo nosho wo aatiyali ya go.
Omukwaniilwa kwa ti wo elelo olyuulika omutseyiveta meme Elize Angula ongomukalelipo gwa lyo gopaveta.
Omukwaniilwa okwa ulike wo omalenga ge ngoka taka longa na go.
Omalenga ngoka guulikwa ogo nee tatekulu Mushaandja elenga lyo kEpale, tatekulu Amutenya elenga lyaNalusheshete, tatekulu Kamanya elenga lyo kuAmuteya, tatekulu Wilhelm Lidikel elenga lyUukwanambwa, meme Secilia Namene e li kOshuushe, tatekulu Naeman Amalwa e li kOniimwandi, tatekulu John Walenga e li kOndangwa, tatekulu Fillemon Shuumbwa Kauluma go kOngula yaNetanga noshowo tatekulu Joseph Asino e li elenga lyaNiiwe.
Aatiyali yawo oyo nee meme Petrina Armas go kOngula yaNetanga, tatekulu Tonata Ngulu go kEpale, tatekulu Fillemon Nambili Uukwanambwa, tatekulu Johannes Nikodemus naye oku li kOngula yaNetanga, tatekulu Armas Amoomo Omulondo, tatekulu Tomas Nakanyala oku li kOndangwa, tatekulu Martina Nashandi oku li kOniimwandi, Tatekulu Kleopas Augustus ogo kOniiwe, tatekulu Kaanana Hishoono oku li kOngula yaNetanga, tatekulu Lot Kasaane naye oku li kOndangwa, tatekulu Johannes Neema okOshuushe, tatekulu Naikaku omutiyali gwelenga lyAmuteya, tatekulu Kashona Malulu oku li kOnalusheshete
Omanga tatekulu tatekulu Ismael Shailemo naye e li kOshuushe yo na tatekulu Frans Shitungu.
Omukwaniilwa okwa u li ke wo tatekulu Nikodemus Uugwanga ongomunambelewa omukuluntu melelo lyoshilongo.
Manikies Kambonde oye omuyakuli gomukwaniilwa ayehe mbaka oya li ya pewa oombapila dho mauliko ga wo poshigongi shika. Omukwaniilwa okwati Ondonga opo tayi kala.
Moshipopiwa she sho apopitha aalelwa ye, omukwaniilwa, Shuumbwa okwa indile aandonga ya longelekumwe nokwa uvaneke kutya ye otaka landula naanaa ooveta ngaashi naanaa dha li dhatulwapo kooyinakulu manga aakolonyeki ya li inayeya muNamibia.
Omukwaniilwa okwa holola wo euvo nayi lye kombinga yomadhipago giipundjamenye ngoka giindjipala maagundjuka.
Okwati oshinima shaagundjuka taya otekathana osho naanaa oshi etithi shomadhipago mokati kaagundjuka oshoka otaya gondathana yo manga aakuluntu yawo ka yeshi shi.
Okwati aagundjuka naya kale ye li moohole dhishiwike kaakuluntu yawo oshoka nuuna mboka aagundjuka mbaka taya ka monika kaakuluntu ye li nookuume yopaihole aape aakuluntu otaya vulu okupula kutya ngiini.
Okwa indile wo kaakuluntu ka yakale owala taya ti uunona owa nakanena yo taya talako owala ngokuuvu wakatali yo inata ya kumagidha aagundjuka.
“Okanona inaka valwa ku nakanena. Okanona ongoye wekavala. Natu simanekeni omithigululwakalo dhetweni ngele katuneni omakankameno otatu kala twafa efo tali pepwa kombepo,” osho omukwaniilwa akumagidha.