Namlodge 2000 atamekitha omatelelopo giipambele yopamuthigululwakalo

Ku Eliaser Ndeyanale

OSHINYANGA shaayenda shedhina Namlodge 2000 shi li oshinano shookilimenta omulongo lwaampoka okuza mo mOshakati mondjila yuuka kOngandjera osha tamekitha ehangano lyasho epepeka nelalakano oku pendulapo omatalelopo giipambele yo pamuthigululwakalo dhoshiNamibia.

Ehangano ndika tali ithanwa Eco-Cultural Tourism olya li lya tamekithwa ongulohi yEtiyali komupevi minister mombelewa ya prime minister Dr Chief Samuel Ankama, nelalakano okupendulapo iikwamuthigululwakalo noonkulukedhi dhoshiNamibia mekwatathano naatalelipo muuyuni auhe.

Elalakano lyehangano ndika okugandja omadheulo patseyo dhesiloshipwiyu lyaatalelipo yo pamuthigululwakalo noonkulunkedhi no showo oku gandja elongo kaalongekidhi yomalweendo gaatalelipo, okugandja elongo kaahwahwameki yomalweendotalelipo.

Oku tula pondondo yopombanda omalanditho giilongomwa yokomake yokomake moshilongo shetu.

Omusamane Ankama okwati ehangano lyo Eco-Cultural Tourism Namibia oli li ontopa yo ku endela, mo ku ulika uukwatya womithigululwakalo dhaNamibia kaantu yalwe muuyuni.

Otati wo aantu oyendji muuyuni mba yena ohokwe oku mona omithigululwakalo dhaNamibia otaya vulu oku ninga omakwatathano nehangano ndika opo yeya ongaatalelipo.

“Mokutalelapo aatalelipo otaya kalala momahala getu nokulya iikulya yetu, iilongomwa yiikahayetu na ota ya ka thiga mo oshimaliwa oshindji moshilongo shetu.

“Moku taamba aatalelipo otwa pumbwa oku ilongekidha nawa opo aatalelipo ya hokwe omayakulo getu, iilandithomwa yetu oshowo omahala gokulala no gokuyakulila,” osho a ti.