Omulongwa apulumuthila moskola taka pulwa
Ku Eliaser Ndeyanale
OMULONGWA go moskola yopombanda yaShigambo ngoka a li a pulumuthile moskola ndjoka iiwike iyali ya piti otaka pulwa aniwa a popye kutya he yokanona olye no ya kala haya monathana ngiini.
Shika osha li sha kolekwa komulongi gumwe go poskola mpoka a lombwele onzonkundana ndjika oshiwike shika. Ota hokolola wo kutya aakuluntu noshowo aatekulu yokanona haka otaya ka ithanwa wo koskola ndjoka opo ya kaningilwe omapulaapulo.
“Oshili otashi kumitha kutya okanona ke li momuhandjo goskola ota ka ningi etegelelo ngiini? Aakuluntu oya pumbwa oku lombwela elelo lyoskola kutya ngele oya kala yeshi kutya okanona haka oka li kena epunda nenge kaya li ye shi shi. Ngele oya li yeshi oshike inaya lombwela oskola? Oya pumbwa oku tu lombwela osho omulongi a popi.
Okwa gwedha po wo kutya oha hala oku uva kutya he yokanona omunaskola gomoskola moka nenge omuntu go kondje.
Omulongwa nguka okwa li amono ohanana omanga e li poskola yawo moka uusiku wOsoondaha yoshiwike sha zi le ko.
Omunaskola nguka gomimvo omulongo nane noku li mondondo ontihetatu okwa li aniwa a yi pegumbo lyomulongi gumwe poskola yawo mpoka ta ti kutya ota ehama mepunda. Omulongi nguka aniwa okwa li adhengele omupangi gontumba go poshipangelo sha Onandjokwe ngoka a li akwathele okanona haka okanaskola.
Omanga aniwa ya tegelela omupangi aholoke poskola, omulongwa nguka okwa li apulumutha. Nokonima ya shika, omulongwa nohanana oya li ya falwa koshipangeno no konima ohanana ndjika aniwa oha li ya hulitha omanga ye li mondjila okuya koshipangelo.
Pethimbo ndika onzonkundana ndjika inayi tseya kutya na kupa okanona hano etegelelo omunaskola omukwawo nenge omuntu go kondje yoskola, uuyelele kutya ohanana oya hulitha ngiini nawo ina u yela oshoka elelo lyoskola ndjoka ina li hala oku gandja uuyelele.
Omukuluntuskola tate Pinehas Ekongo okwa zi mine oshiningwanima shomulongwa amonena okanona moskola ashike okwa tindi okuya mule washo oshoka aniwa elelo lyoskola olyo lina uuthemba wo kutya ko sha koshiningwanima.
Okwati mboka ye li melelo lyoskola taya vulu okutya kosha ongaashi tate Obed Mushaandja noshowo omusitagongalo tatekulu Wilhem Hainane.
Ashike tate Mushaandja okwati ye naye ita vulu okutya kosha koshinima shika. “Ngoka ta vulu okupopya kombinga yoshinima shoka omusitagongalo tatekulu Wilhelm Hainane oshoka oye omukalelipo gongerki ya ELCIN melelonongelo lyoskola yaShigambo,” osho tate Mushaandja ati ngaaka.
Sho apulwa atye ko sha tate Hainane okwati ye i ta popi nande kutya osha ende ngiini ashike okwa zi mina kutya oshiningwanima osha ningwa shili.
“Onda pewa olopota koskola yaShigambo ashike itandi vulu nande oku gandja uuyelele mbuka kiikundaneki oshoka okanona haka okena onkalamwenyo komeho. Naakuluntu ya ko inaya lombwelwa. Onkene ondi wete kutya ngele onda popi shoka shili molopota moka otandi hanagulapo onkalamwenyo yomunona nguka.
“Ethimbo limwe otwa hala shili okutya otatu kundaneke oshigwana ashike otatu teya po oshigwana. Okanona haka okashona. Nongongahangano yongerki ya ELCIN inayi tseyithilwa natango.
“Omunaskola okwa li a falwa koshipangelo. Katuna uuyelele. Uuyelele oundji otaukeya owala konima sho okanona haka ya mehungomwenyo. Olopota ndjika kayina uuyelele oundji. Katushiwo kutya uunyelele mboka tuna owo mondjila tuu oshoka ngashingeyi shama gumwe ota ipula ngaa nee kutya oshike shaningwapo. Omunaskola nguka ngashiingeyi oku li momake gaatonateli ye,” osho tatekulu Hainane ohokolola.
Ngoka e li pehala lyomunambelewa gwelongo moshitopolwa shaShikoto omusamane Vilho Shipuata okwa ti ineshi uva.
Omupopiliko go polisi yo Nampol inspector Ellen Nehale naye wo okwa ti ombelewa ye ina yi tseyithilwa sha kombinga yoshiningwanima shika.