Ongendjo yongerka ya Elim ya yakwa po
Ku Eliaser Ndeyanale
EGONGALO lya Elim li li moshitopolwa shaMusati olya yakelwa ongendjo ya lyo kaafuthi moshiwike sha zi ko.
Engongalo ndika li li moshikandjongerki shongerki yaELCIN shokuuninginino olyo etiyali ngashingeyi okuyakelwa ongendjo omumvo nguka.
Konima yoomweedhi mbali dha piti, egongalo lyaShakati olya li lya yakelwa ongendjo yalyo kaafuthi. Ongendjo ndjoka inaya monika sigo okonena ndjika.
Otaku hokololwa kutya ongendjo oya yakwapo okupendukila uusiku wOlyomakaya goshiwike sha zi ko.
Egongalo lyaShakati olya ningi oshihakanwa shoombudhi sho lya yakelwa iinima ya lyo oyindji yindji.
Pethimbo ongendjo yegongalo lyaShakati, omusitagongalo gwegongalo ndyoka tatekulu Erasmus Nangongo okwa lombwele aakwanegongalo pethimbo a li tiigidha omayigidho mOsoondaha yimwe konima yelongeloKalunga kutya ongendjo oya yakwapo.
Okwati ye okwa li eshi dhimbulula kutya ongendjo oya yakwapo konima sho a li a lombwele gumwe gomaakwanegongalo opo a keyi dhenge opo awape okutameka nelongeloKalunga lyoshituthifumviko shomukwanegongalo gontumba shoka sha li ko esiku ndyoka.
Omukwanegongalo ngoka a li ta ka dhenga ongendjo aniwa sho a thiki mokatala moka mwa li muna ongendjo, okwa adha ongendjo kayi mo.
Nokwa li nduno a lombwele Omusita kutya ongendjo kayimo. Omusitagongalo okwa londodha aakwanegongalo ya kale ya londoka nokupulakena ngele otaya uvu omuntu ta landitha ongendjo opo ya katale ngele oyo ndji yegongalo ndyoka nenge aawe.
Konima yiiwike iya li konima sho ongendjo ya yakwa po egumbo lyegongalo moka tatekulu Nangongo ha kala olya li lyatewa koombudhi nokukuthamo iinima.
Tatekulu Nangongo, okwa li a tulilemo aafuthi nenge omufuthi ngoka iiyakele megumbo lyegongalo koongulasha dhOsoondaha yoshiwike sha zileko nokuyakamo o TV yo Panasonic, o lap top yo Lenovo noshowo ongodhi yopeke yo Samsung.
Ayihe mbika oyi na ongushu yoondola omayovi omulongo na limwe (N$11000) lwaampoka.
Sho a li ayiwa naye moonkundathana konzokundana ndjika mEtiyali lyoshiwike sha zile ko, tatekulu Nangongo okwa ti kalyamupombo okwa pitile mekende lyondunda yaayenda nokwa kutha mo o TV, o lap top noshowo ongodhi yopeke mbyoka ya li ya tulwa poshipundi shesofa oshiluudhe shoka shili mondunda yaayenda.
Okwati wo omufuthi ka li akwatwa natango.
Omusitagongalo okwati okwa li adhimbulula eyako po lyiinima ongula yOsoondaha sho apenduka.
Tatekulu Nangongo, okwati konima wala yoomwedhi mbali dha piti, egongalo olya li lya kanitha eshina lyokopiuta ndyoka lya li lya yakwa moshinyanga kaafuthi.
Okwa hokolola kutya aafuthi mboka yali yiiyakele moshinyangagongalo oya li ya pitile mekende lyokonima lyongerka taye ya mongerka nokuteya omweelo ngoka guli pokati kongerka noshinyanga. Omweelo moka omusitagongalo halongitha uuna teya mongerka Osoondaha kehe.
Okwa gwedhapo wo kutya oomivo dhapiti egongalo lyaShakati dhoka li li molukanda lUupindi popepi nosekondele yaIipumbu olya li lya yakelwa omambako ngoka egongalo ha li longitha pethimbo lyelongeloKalunga.
Omusitagongalo okwati ondando yomambako iteyi dhimbulukiwa naanaa oshoka keshi kutya oga li ga landwa noshimaliwa shithike peni, oshoka oga li ga landwa pethimbo ndyoka mpanga a li inaya megongalo ndyoka.
Omusitagongalo okwati eyakepo lyiinima yegongalo otali shunitha egongalo monima oshoka ngashiingeyi egongalo ota li kakonga omakwatho ngaashi okunyanyangidha oombapila pondje yegongalo ngaashi kuundunda wokunyanyangidha mboka hau ithanwa printing shop oshoka omashina oga yakwapo.
Ngashiingeyi omusitagongalo okwa patulula oshipotha sheteyo lyegumbo shonomola 124/07/2019.
MOsoondaha ya zi ko omanga nokuli elongeloKalunga ina li tameka, omusitagongalo okwa lombwele egongalo kutya “inandi lalapo nande nena oshoka oombudhi odhiiyakela megumbo lyegongalo etadhi kuthamo o TV, o lap top yegongalo noshowo ongodhi yopeke yo Samsung.”
Omusita okwa lombwele onzonkundana ndjika kutya o lap top ndjoka ya li ya yakwapo oyegongalo yali ya sindanwa kongundu yoomeme megongalo.
“Paife otatu longo nuudhigu oshoka okopiuta yetu oya yakwapo, o lap top yegongalo nayo oya yakwapo nuukalata wokusikilila uuyelele wo pa electronic nawo owa yiwa nawo, ano uu USB,” osho tatekulu Nangongo alombwele onzokundana ndjika mEtiyali lyoshiwike shika poshinyanga shegongalo.
Tatekulu Nangongo ota indile kaasamaria aanamutimahenda opo yakwalethe egongalo ye li landele eshina lyokutopaatopa.
Omupopiliko gopolisi moshitopolwa shaShana warrant officer Frieda Shikole okwati ka li ena uuyelele wetewo lyegumbo lyomusitagongalo gwaShakati ethimbo a li a yiwa naye moonkundana.