Oondya dhoshikukuta dhanuninwa oshitopolwa shaMusati dhili natango kOkongo
Ku Eliaser Ndeyanale
IIKULYA yoshikukuta yanuninwa oku gandjwa kaanafaalama yo moshitopolwa moka mboka ye li taya dhengwa ku nakiidhi inayi ka talwa ko natango koompungulilo dhepangelo kOkongo moshitopolwa shaHangwena.
Shika otashi thamunwa kuuyelele wo li molopota yo pambelewa yoshitopolwa shoka yomasiku ga 07 June nuumvo.
Olopota otayi ti kutya oshinakugwanitha shokukatalako iikulya mboka osha li sha pewa uuministeli wegameno ashike uuministeli mboka owa li wa ndopa oku ka tala ko iikulya mbyoka yo yi wape oku gandjwa ku mboka yena okuyi pewa.
Uuministeli mboka owa li wa pewa oshinakugwanitha shika kombelewa ya prime minister, ashike shika ina shi gwanithwapo.
Elelo lyoshitopolwa shika olya tokola opo li pule kombelewa ya prime minister opo iikulya mbyoka yi kale ya thikithwa moshipopolwa yo yi kale ya gandjwa ku mboka yena okuyipewa.
Oshiwike sha zi ko ngoloneya goshitopolwa shaMusati omusamane Erginus Endjala okwa lombwele onzonkundana yo Confidente kutya aanafaalama yo moshitopolwa she inaya mona omuloka gwa gwana onkene otaya ka teya.
Okwa popi wo kutya pethimbo ndika aantu ye li omayovi omilongo mbali nagatano nomathele omugoyi nomulongo na gumwe mOmusati oya pumbwa iikulya
Oshitopolwa ngaashi shaShana osha ka talako nale iikulya mbyoka sha pewa koompungulilo dhepangelo kOkongo. Hoka oshitopolwa shapewa ko nale nokuli ooshako dhiilya omakende gomagadhi noshowo oondooha dhoohi.
Ngoloneya goshitopolwa shaShana tate Elia Irimari okwa lombwele onzonkundana ndjika oshiwike sha zi ko kutya “Otwa li wo twa pewa omakende gomagadhi gunene wo 750ml ge li omayovi gane nomathele gahamano. Ayihe mbika oyili nale mompungulilo mOshakati. Otwa pewa wo oondooha dhoohi dhili omayovi omulongo naga hetatu, oondooha dhika otwa tegelela dhikale dha dhikilwa mbala kuuministeli woohi, omanga uuministeli wegameno owe tu kwathela oololi mbala naahingi yane opo ya kwathele mokutopola iikulya,” osho tate Irimari a ti.
Sho a li ayiwa naye moonkundathana konzo nkundana yo Confidente ngoloneya goshitopolwa shaShana omusamane Elia Irimari, okwati omagumbo geli omayovi omulongo nagatano nomathele gatatu nomilongo hamano nalimwe mOshana oga pumbwa iikulya yoshikukuta. Ngoloneya ota ti wo kutya momagumbo moka omuna aantu yaadha pomwaalu gomayovi omilongo heyali nagaane nomuntu gumwe (74 0001).
Omupresidente Hage Geingob okwa holola wo mEtiyali lyoshiwike sha zi ko kutya aantu yethike pomayovi omathele gaheyali moshilongo ashihe oye li mompumbwe yiikulya.
Omupresidente okwa li a popi dhika pohotela yedhina Windhoek Country Club and Resort yi li muumbugantu woshilando pangelo Ovenduka.